بنگلا دیش کرکٹ ٹیم کے سابق کپتان شکیب الحسن کو جنوبی افریقا کے خلاف ہوم سیریز کھیلنے کی اجازت مل گئی ہے۔ شکیب الحسن ایک قتل کے مقدمے میں نامزد ہیں، جس کی وجہ سے وہ وطن واپس نہیں جا سکے۔

آل راؤنڈر شکیب الحسن نے پاکستان کے خلاف سیریز کھیلنے کے بعد انگلینڈ کا سفر کیا اور پھر بھارت میں ٹیم میں شامل ہوئے۔ اس سلسلے میں بنگلا دیش کرکٹ بورڈ کے کرکٹ آپریشنز کے سربراہ شہریار نفیس نے بتایا کہ شکیب کے بنگلا دیش میں کھیلنے میں کوئی رکاوٹ نہیں ہے، اور حکومت کا واضح پیغام ہے کہ کسی کو غیر منصفانہ طور پر ہراساں نہیں کیا جائے گا۔

شہریار نفیس نے مزید کہا کہ اگر شکیب الحسن انجری یا فارم کی وجہ سے منتخب نہیں ہوتے تو یہ ایک الگ معاملہ ہے، لیکن ان کے کھیلنے میں کوئی مسئلہ نہیں ہے۔ حکومتی قانونی مشیر نے بھی یہ یقین دہانی کرائی ہے کہ شکیب الحسن کی وطن واپسی پر انہیں گرفتار نہیں کیا جائے گا۔

جنوبی افریقا کی ٹیم اکتوبر میں دو ٹیسٹ میچز کی سیریز کے لیے بنگلا دیش کا دورہ کرے گی، جس میں دونوں ٹیموں کے درمیان پہلا ٹیسٹ 21 اور دوسرا ٹیسٹ 29 اکتوبر کو کھیلا جائے گا۔