آپ نے سنا ہوگا کہ خلا میں وقت مختلف طریقے سے گزرتا ہے۔ حال ہی میں دو خلاباز، بَچ وِل مور اور سُنیتا ولیمز بین الاقوامی خلا اسٹیشن (ISS) پر پھنس گئے ہیں، لیکن ان کے لیے ایک دلچسپ بات یہ ہے کہ وہ زمین پر واپس آتے وقت تھوڑی کم عمر محسوس کریں گے۔

یورپی خلا ایجنسی کے مطابق ”ISS“ پر چھ ماہ گزارنے سے تقریباً 0.005 سیکنڈ کی عمر کم ہو جاتی ہے۔ یہ سب کچھ البرٹ آئن اسٹائن کے نظریہ اضافیت کی وجہ سے ہوتا ہے۔ جیسے جیسے کوئی چیز روشنی کی رفتار کے قریب ہوتی ہے، وقت آہستہ ہو جاتا ہے۔ ISS زمین کے گرد 27,500 کلومیٹر فی گھنٹہ کی رفتار سے گھومتا ہے، جو اس عمل کو مزید دلچسپ بناتا ہے۔

دوسری جانب زمین کی کشش ثقل بھی اس میں کردار ادا کرتی ہے۔ جتنی دوری آپ زمین کے مرکز سے رکھتے ہیں اتنی ہی آہستہ آپ کی عمر بڑھتی ہے۔ اس کی وجہ یہ ہے کہ خلا میں کشش ثقل کمزور ہوتی ہے، جس کی وجہ سے وقت کا گزرنا سست ہو جاتا ہے۔

ایک مطالعے کے مطابق خلا میں زیادہ وقت گزارنے والے خلابازوں کے جسم میں ہڈیوں کی صحت پر منفی اثرات مرتب ہوتے ہیں۔ ایک تحقیق میں یہ بات سامنے آئی کہ کچھ خلابازوں کی ہڈیاں زمین پر واپس آنے کے بعد بھی ایک سال تک بحال نہیں ہو سکیں، جس کی وجہ سے ان کی ہڈیوں کی کثافت میں 2 فیصد کی کمی واقع ہوئی۔

انسانی عمر کی تبدیلی کے حوالے سے ناسا نے پہلے ہی دو جڑواں خلا باز مارک اور اسکاٹ کیلی کے اثرات کا مطالعہ کیا۔

مارک اسکاٹ سے چھ منٹ پہلے پیدا ہوا تھا۔ دونوں نے بین الاقوامی خلا سٹیشن پر وقت گزارا۔ اسکاٹ نے اپنے بھائی مارک کے مقابلے میں خلا میں تقریباً دس گنا زیادہ وقت گزارا۔

اس مطالعے میں دیکھا گیا کہ تیز رفتار اور دیگر عوامل کی بنا پر مارک اپنے بھائی سے پانچ ملی سیکنڈ زیادہ عمر کا تھا، کیونکہ اسکاٹ نے خلا میں زیادہ وقت گزارا تھا۔

اس کے علاوہ جاپانی خلا کی تحقیق کے ادارے نے خبردار کیا کہ خلا میں طویل قیام کے دوران خلا بازوں کو تابکاری کے اثرات کے خطرات کا سامنا ہوتا ہے، جو انہیں کینسر کے خطرے میں مبتلا کر سکتا ہے۔