نیٹو کی ملٹری کمیٹی کے سربراہ ایڈمرل راب باؤر نے یوکرین کے روس کے اندر حملے کی اجازت کی حمایت کردی۔

غیر ملکی میڈیا کے مطابق سربراہ ایڈمرل راب باؤر نے کہا کہ یوکرین کو روس کے اندر حملے کا قانونی اور فوجی حق حاصل ہے، ہر قوم جس پر حملہ کیا جاتا ہے اسے اپنے دفاع کا حق حاصل ہوتا ہے۔

دوسری جانب جرمنی نے یوکرین کے روس کے اندر حملوں کی سخت الفاظ میں مخالفت کردی۔

جرمن چانسلر اولاف شولز کا اس حوالے سے کہنا ہے کہ وہ اس بات کی مخالفت جاری رکھیں گے کہ روس کیخلاف یوکرین کو طویل فاصلے تک مار کرنے والے میزائل حملوں کی اجازت دی جائے۔

چانسلر شولز کا کہنا ہے دیگر ممالک اجازت دیں تو بھی جرمنی مخالفت جاری رکھے گا، جرمن ہتھیار یوکرین نے روس کے خلاف استعمال کیے تو ہمیں مشکلات درپیش ہوں گی۔

ان کا کہنا تھا کہ امریکا سمیت مغربی ممالک میں اس بات پر بحث جاری ہے کہ آیا یوکرین کو روس کیخلاف طویل فاصلے تک مار کرنے والے میزائل استعمال کرنے کی اجازت دی جائے یا نہیں۔