ہواوے نے اپنے نئے تین تہوں والے (ٹرائی فولڈ) فون ’میٹ ایکس ٹی‘ کی رونمائی کی ہے، جو ایپل کے آئی فون 16 کی لانچ کے چند گھنٹوں بعد متعارف کیا گیا۔ اس کی ابتدائی قیمت تقریباً آٹھ لاکھ پاکستانی روپے یا 2800 امریکی ڈالر ہے، جو چین کے شہر شینزین میں تقریب کے دوران پیش کی گئی۔

کمپنی کی ویب سائٹ کے مطابق اس فون کے لیے لانچ سے پہلے ہی 40 لاکھ آرڈر موصول ہو چکے ہیں۔ ہواوے کے ایگزیکٹو ڈائریکٹر رچرڈ یو نے تقریب میں کہا کہ یہ ایک ایسی پروڈکٹ ہے جس کے بارے میں لوگ سوچتے ہیں لیکن بنا نہیں سکتے۔

انھوں نے مزید کہا کہ یہ ”سائنس فکشن کو حقیقت میں بدلنے“ اور فولڈنگ ڈیوائس کی ایک نئی پراڈکٹ کے آغاز کا وقت ہے، یہ تمام خصوصیات میٹ ایکس ٹی کو دیگر فونز سے ممتاز کرتی ہیں اور ممکنہ طور پر مارکیٹ میں ایک نیا معیاری قائم کر سکتی ہیں۔

خصوصیات

رچرڈ یو نے اس نئے فون کی خصوصیات کا ذکر کرتے ہوئے کہا کہ اس میں مصنوعی ذہانت پر مبنی ٹیکسٹ سمری، ترجمے، اور ایڈیٹنگ کے فنکشنز شامل ہیں۔ مزید برآں، مصنوعی ذہانت کی مدد سے تصویروں کی ایڈیٹنگ اور ناپسندیدہ حصوں کو تراشنے کی صلاحیت بھی موجود ہے۔

یہ فون ہوواوے کی ’کلین چپس‘ کی سپورٹ حاصل کرتا ہے، جو اس کی کارکردگی کو مزید بہتر بناتی ہے۔

ڈیزائن اور قیمت

’میٹ ایکس ٹی‘ سرخ اور کالے رنگ میں دستیاب ہوگا، اور اس کی اسکرین کا سائز 10.2 انچ ہے۔ کمپنی کا دعویٰ ہے کہ یہ ”دنیا کا سب سے پتلا فولڈ ایبل فون“ ہے، جس کی چوڑائی 3.6 ملی میٹر ہے، اور یہ باآسانی جیب میں رکھے جانے کے قابل ہے۔

256 گیگا بائٹ میموری: 19,999 یوآن (تقریباً 2,800 ڈالر) زیادہ میموری والے ورژن: 21,999 یوآن سے 23,999 یوآن

مارکیٹ کی صورتحال

اگرچہ چین میں ایپل کی مصنوعات کی مانگ پہلے بہت زیادہ تھی، حالیہ سالوں میں ایپل کی فروخت میں کمی آئی ہے۔ اس وقت ایپل چین میں درجہ بندی میں تیسرے سے چھٹے نمبر پر پہنچ چکا ہے۔

امریکہ کی جانب سے چپس کی عالمی سپلائی پر پابندی کے باوجود، ہواوے نے مقامی طور پر تیار کردہ چپس کے ساتھ اپنے سمارٹ فونز متعارف کروائے ہیں۔

ہواوے کے پاس پہلے سے دو فولڈ ایبل فونز ہیں، اور چین میں ان کی زبردست فروخت نے اسے سیم سنگ کو پیچھے چھوڑنے میں مدد فراہم کی ہے، جس کے بعد ہواوے عالمی سطح پر فولڈنگ فون بنانے والی سب سے بڑی کمپنی بن گئی۔

تجزیہ

تجزیہ کاروں کا خیال ہے کہ ’میٹ ایکس ٹی‘ کی محدود پروڈکشن اور 2800 ڈالر کی قیمت، جو آئی فون 16 پرو میکس سے دوگنا زیادہ ہے، اسے زیادہ فروخت کی بجائے ہوواے کی تکنیکی مہارت کے طور پر پہچانے جانے کا موقع فراہم کرے گی۔