بھارتی ریاست منی پور میں باغیوں نے سیکیورٹی فورسز پر حملوں کے لیے ڈرون کا استعمال شروع کردیا۔

بھارتی میڈیا کے مطابق پولیس نے بتایا کہ منی پور کے امپھال مغربی ضلع میں عسکریت پسندوں نے ڈرون کا استعمال کرتے ہوئے ایک بم حملہ کیا جس سے ایک 23 سالہ خاتون زخمی ہوگئی۔

دو دنوں میں یہ دوسرا ڈرون حملہ ہے۔ چند روز قبل بم اور بندوق کے حملوں میں دو افراد ہلاک اور نو زخمی ہوئے تھے۔

انہوں نے بتایا کہ پیر کی شام سنجام چرانگ کے مقام پر ڈرون سے کم از کم دو دھماکہ خیز مواد گرایا گیا جس میں خاتون زخمی ہو گئی۔

اسے پیٹ پر زخموں کے ساتھ اسپتال میں داخل کرایا گیا ہے اور اس کی حالت مستحکم بتائی جاتی ہے۔

عسکریت پسندوں نے ایک پہاڑی کی چوٹی سے سیجم چرانگ گاؤں پر بھی اندھا دھند فائرنگ کی جس پر سیکورٹی فورسز نے جوابی کارروائی کی۔