جنوبی امریکا کے ملک چلی کے دارالحکومت سانتیاگو کے انٹرنیشنل ایئر پورٹ پر ایک مسافر نے مشتعل ہوکر ہتھوڑے سے توڑ پھوڑ کر ڈالی۔ یہ شخص میامی جانا چاہتا تھا اور وہاں سے اُسے ہیٹی جانا تھا۔

جب یہ مسافر چیک اِن کے لیے امریکن ایئر لائن کے کاؤنٹر پر پہنچا تو اُسے بتایا گیا ہے کہ اُسے کسی نے جعلی ٹکٹ بیچا ہے۔ یہ سننا تھا کہ وہ شخص آپے سے باہر ہوگیا اور قریب ہی پڑا ہوا ہتھوڑا اٹھاکر کمپیوٹرز اور اسکرینز کو توڑ شروع کردیا۔

وہاں موجود لوگوں نے اس واقعے کو اپنے اپنے سیل فون میں ریکارڈ کرلیا۔ اس حوالے سے وائرل ہونے والی ویڈیو میں دیکھا جاسکتا ہے کہ مشتعل مسافر نے 5 کمپیوٹر اور 6 اسکرین توڑ ڈالیں۔

پولیس نے اس شخص کو گرفتار کرلیا۔ اُسے آج ہفتے کو عدالت میں پیش کیا جائے گا۔ اندازہ لگایا گیا ہے کہ اُس نے ایئر پورٹ پر جو توڑ پھوڑ کی اُس سے 2 کروڑ چِلین پیزوز یعنی کم و بیش 22 ہزار ڈالر کا نقصان ہوا۔