سندھ کے مختلف اضلاع میں بارش کے باعث تعلیمی اداروں میں عام تطیل کا اعلان کیا گیا ہے، جبکہ کراچی کے اسکول معمول کے مطابق کھلے رہیں گے، کراچی کے ضلع وسطی میں بارشوں کے پیش نظر کل بروز جمعرات اسکول بند رکھنے کا فیصلہ کیا گیا تھا، تاہم، اب ضلعی انتظامیہ نے اس فیصلے کو واپس لے لیا ہے۔

بدین میں بھی بارش کے باعث سرکاری و نجی اسکول دو روز بند کرنے کا حکم جاری کیا گیا ہے، ڈپٹی کمشنر بدین نے تعلیمی اداروں کی بندش کا نوٹیفکیشن جاری کردیا۔

جامشورو میں بھی ضلع بھر کے تعلیمی اداروں میں تین روزہ عام تعطیل کا اعلان کیا گیا ہے، ڈپٹی کمشنر کی جانب سے جاری نوٹفکیشن کے مطابق ضلع بھر میں تعلیمی ادارے 29 تا 31 اگست تک بند رہیں گے۔

اس کے علاوہ ڈپٹی کمشنر سانگھڑ نے بھی بارش کے باعث دو روز کیلئے تعلیمی اداروں میں عام تعطیل کا اعلان کیا۔

کراچی کے ضلع وسطی میں کل تعلیمی ادارے بند رکھنے کا نوٹیفکیشن منسوخ

ڈپٹی کمشنر ضلع وسطی کراچی نے کل تعلیمی ادارے بند رکھنے کا نوٹفکیشن جاری کیا تھا، جسے کچھ دیر بعد منسوخ کردیا گیا۔

دیگر اضلاع کے ڈی سیز نے ابھی تعلیمی اداروں کی بندش کو کوئی فیصلہ نہیں کیا۔

اسکول بندش کا فیصلہ ہر ضلعے کا ڈی سی خود کرے گا۔

کل شہر کے تمام تعلیمی ادارے کھلے رہیں گے۔