حماس کے سربراہ اسماعیل ہنیہ کی شہادت کے بعد سے مشرقِ وسطیٰ میں ایک بڑی جنگ کے شروع ہونے کا خطرہ شدت اختیار کرتا رہا ہے جبکہ ایران کی قیادت کہہ چکی ہے کہ وہ مناسب وقت آنے پر اسرائیل کو نشانہ بنائے گی اور یہ کہ وہ کوئی بھی اقدام عجلت آمیز انداز سے نہیں کرے گی۔

دوسری طرف لبنان کے مختلف علاقوں سے حزب اللہ شمالی اسرائیل کو نشانہ بنارہی ہے۔ کم و بیش یومیہ بنیاد پر ہونے والے ان حملوں کے نتیجے میں اسرائیل کو خاصا نقصان بھی برداشت کرنا پڑ رہا ہے۔

ہفتے کی شب بھی حزب اللہ نے لبنان کے مختلف علاقوں سے شمالی اسرائیل پر راکٹ برسائے۔ اسرائیل کی فوجی تنصیبات کو نشانہ بنایا گیا۔ راکٹ گرنے سے چند ایک مقامات پر آگ لگ گئی۔

اسرائیلی فوج کو مکمل تیاری کی حالت میں رکھا گیا ہے۔ بعض علاقوں میں فوجیوں کی نقل و حرکت بھی بڑھی ہے۔ کسی بھی ہنگامی صورتِ حال کے لیے تمام متعلقہ سویلین اداروں کو بھی تیار رہنے کی ہدایت کی گئی ہے۔ کسی بھی سطح کی جنگ چھڑنے کی صورت میں رو بہ عمل لانے کے لیے مختلف منصوبے تیار کیے گئے ہیں۔

جنوبی لبنان سے کیے جانے والے حملوں کا خمیازہ شامی پناہ گزینوں کو بھگتنا پڑتا ہے۔ اسرائیلی فوج جب جوابی کارروائی کے طور پر جنوبی لبنان کو نشانہ بناتی ہے تو وہاں مقیم شامی پناہ گزینوں کا جانی و مالی نقصان ہوتا ہے۔ یہ لوگ جنوبی لبنان سے کہیں جا بھی نہیں سکتے۔