قومی کرکٹ ٹیم کے فاسٹ بولر نسیم شاہ نے والد کو کرکٹ میچز سے دور رکھنے کے پیچھے اہم انکشاف کیا ہے۔

کرک بز سے بات کرتے ہوئے نسیم نے انکشاف کیا کہ ان کے والد صحت کے مسائل سے دوچار ہیں، اور جب ٹیم ہار جاتی ہے تو وہ پریشان ہو جاتے ہیں۔

قومی کرکٹرز ماہانہ کتنا معاوضہ وصول کرتے ہیں؟

نسیم شاہ کا کہنا تھا کہ کرکٹر کی زندگی کے پس منظر میں کئی چیزیں ایسی ہوتی ہیں جن کے بارے میں لوگ نہیں جانتے۔ میرے والد صحت کے کچھ مسائل سے گزر رہے ہیں۔ ایک وقت تھا جب وہ کرکٹ کے بارے میں کچھ نہیں جانتے تھے، لیکن اب وہ میچ کی ہر گیند کو دیکھتے ہیں اور جب ہم ہارتے ہیں تو پریشان ہو جاتے ہیں۔

انہوں نے بتایا کہ اس لیے میں ہر بڑے میچ سے قبل اپنے بھائیوں کو فون کر کے کہتا ہوں کہ وہ اس بات کو یقینی بنائیں کہ والد کرکٹ میچ نہ دیکھیں۔

نسیم شاہ نے 2024 کے T20 ورلڈ کپ کے بعد مسابقتی بولنگ کے دباؤ سے ضروری وقفہ لیا۔ اگرچہ انہوں نے نیشنل کرکٹ اکیڈمی میں اپنے کھیل پر کام کرنے میں وقت گزارا، لیکن انہوں نے اپنے خاندان کے ساتھ رہنے کو بھی ترجیح دی۔