بھارتی ریاست مغربی بنگال میں ایک جونیر ڈاکٹر سے زیادتی اور قتل کے معاملے کو ملک گیر تحریک کی شکل دینے کی کوشش کی جارہی ہے۔ مغربی بنگال کی وزیرِاعلیٰ ممتا بینرجی نے خبردار کیا ہے کہ کچھ لوگ مغربی بنگال کو بنگلا دیش بنانے پر تُلے ہوئے ہیں۔ اُن سے سختی سے نمٹا جائے گا۔

جمعرات کو کولکتہ میں اس کالج پر مشتعل ہجوم نے حملہ کرکے توڑ پھوڑ کی جہاں ایک پولیس اہلکار نے جونیر ڈاکٹر کو زیادتی کے بعد قتل کیا تھا۔ پولیس نے مظاہرین کو روکنے کی کوشش میں آنسو گیس کے گولے داغے اور لاٹھی چارج بھی کیا۔

مرکز میں بی جے پی کی مودی سرکار اس صورتِ حال کو مزید خراب کرنے پر بضد دکھائی دیتی ہے۔ میڈیا آؤٹ لیٹس کے ذریعے جلتی پر تیل چھڑکا جارہا ہے۔

بھارت کے وزیرِاعظم نریندر مودی نے جشنِ آزادی کے موقع پر قوم سے خطاب میں بھی خواتین کی سلامتی کا سوال اٹھاکر مغربی بنگال کی صورتِ حال کو مزید خراب کرنے کی کوشش کی۔

مغربی بنگال کی وزیرِاعلیٰ ممتا بینرجی کا کہنا ہے کہ بعض شر پسند عناصر بنگلا دیش کے سے حالات پیدا کرنے پر تُلے ہوئے ہیں۔ بنگلا دیش میں جو کچھ ہوا اُس کی وجوہ بہت مختلف تھیں۔ مغربی بنگال میں جونیر ڈاکٹر سے زیادتی اور قتل کی واردات ہوئی ہے اور ریاستی حکومت اس بات کو یقینی بنارہی ہے کہ جرم ثابت ہونے پر متعلقہ فرد کو قرار واقعی سزا دی جائے۔