لاہور میں پولیس نے پنجاب اسمبلی کے سامنے اپوزیشن کی جانب سے آزادی کی تقریب کی کوشش ناکام بنا دی اور پولیس نے پنجاب اسمبلی کو جانے والا راستہ بیرئر لگا کر بند کر دیا۔

پولیس کی بھاری نفری نے ارکان اسمبلی کو ایوان اقبال چوک میں روک لیا جبکہ پنجاب اسمبلی کے راستوں کو بیرر لگا کر بند کیا گیا ہے۔ علاوہ ازیں قیدیوں والی وین بھی پنجاب اسمبلی کے سامنے پہنچا دی گئی۔

اپوزیشن اراکین نے کہا کہ پولیس ہمیں آگے نہیں جانے دیں رہی، ہم اب یہیں پر احتجاج ریکارڈ کروائیں گے۔

اس موقع پر اپوزیشن لیڈر پنجاب اسمبلی ملک احمد خان بھچر نے کہا کہ کیا ہم دہشتگرد ہیں، پولیس لگا کر ہمیں ڈرانے کی کوشش جاری ہے، ٹک ٹاکر چچا بھتیجی کیا ہمیں دہشتگرد سمجھتے ہیں۔

انہوں نے کہا کہ پولیس ہمیں روکنے کیلئے کھڑی ہے، ہمارے بنیادی حقوق دبائے جا رہے ہیں، ہمارے اراکین اسمبلی کھڑے ہیں انہیں روک لیا گیا ہے، ہمیں جشن آزادی منانے نہیں دیا جا رہا ہے، وزیراعلیٰ کو کہتا ہوں تم شیشے کے گھر میں بیٹھی ہو۔