بنگلہ دیش کی سابق وزیرِاعظم شیخ حسینہ واجد کے بیٹے سجیب واجد نے کہا ہے کہ میری امی نے اپنے ملک کے لیے بہت کچھ دیا، دن رات ایک کرکے اُسے ترقی سے ہم کنار کیا مگر قوم نے جو سلوک روا رکھا اُس نے اُن کا دل توڑ دیا ہے۔

انڈیا ٹوڈے کو دیے گئے انٹرویو میں سجیب واجد نے کہا کہ جو کچھ بھی بنگلہ دیش میں ہوا ہے وہ اس بات کا ثبوت ہے کہ میری امی کی تمام خدمات کو بھلادیا گیا۔ جب انہوں نے اقتدار سنبھالا تھا تب ملک کی حالت بہت خراب تھی۔ انہوں نے شبانہ روز محنت کی اور ملک کو مضبوط کیا۔

انڈیا ٹوڈے ٹی وی چینل کو انٹرویو میں سجیب واجد نے مزید کہا ہے کہ میری امی کے بارے میں کہی جانے والی یہ بات بے بنیاد ہے کہ برطانیہ نے سیاسی پناہ دینے سے انکار کردیا ہے۔ دراصل انہوں نے ابھی تک فیصلہ ہی نہیں کیا کہ جانا کہاں ہے۔ برطانوی حکومت سیاسی پناہ کی درخواست مسترد تو اُس وقت کرتی جب درخواست دی گئی ہوتی۔

سجیب نے کہا کہ جو کچھ بھی بنگلہ دیش میں ہوا ہے وہ انتہائی افسوس ناک ہے۔ ایسی تبدیلیوں سے ملک صرف پس ماندگی کی طرف جائے گا۔ اس وقت بنگلہ دیش سیاسی بے یقینی اور معاشی استحکام کا متحمل نہیں ہوسکتا۔