ایک طرف ملک میں پاکستان تحریک انصاف (پی ٹی آئی) پر پابندی لگائے جانے باتیں ہو رہی ہیں تو دوسری جانب اس جماعت کا بیانیہ پھیلانے والوں کے خلاف ملک کے مختلف شہروں میں بینرز آویزاں کئے جار ہے ہیں۔

کراچی کی سڑکوں پر موجود اوور ہیڈ برجز سمیت کئی شہروں بشمول اسلام آباد اور راولپنڈی بل بورڈز پر بینرز لگائے گئے ہیں، جن میں پی ٹی آئی کا بیانیہ شئیر کرنے والے صحافیوں، یوٹیوبرز اور رہنماؤں کی تصاویر نام کے ساتھ موجود ہیں۔

امریکا کا پی ٹی آئی کے دفاتر پر چھاپوں اور رہنماؤں کی گرفتاری پر اظہارِ تشویش

ان بینرز میں موجود اشخاص کو ’غدارِ وطن‘ قرار دیا گیا ہے، جبکہ تصاویر کے بیک گراؤنڈ میں نذر آتش کئے گئے جناح ہاؤس کی تصاویر موجود ہیں۔

ان بینرز پر شہبازگل، عادل راجہ، شاہین صہبائی، احمد نورانی، صابر شاکر، شہزاد اکبر، اظہر مشوانی، اور شایان علی جیسے کئی لوگوں کے نام شامل ہیں، ان میں سے اکثر ملک سے باہر موجود ہیں۔

اسلام آباد کے ایف 10 مرکز میں آویزاں بینر پر ’عوام کو جھوٹ سے گمراہ کرنے والے‘ درج ہے، جبکہ کراچی کے ڈرگ روڈ پر لگے بینر پر ’پاکستان دشمن قوتوں سے ڈالر لے کر پاکستانی عوام کو جھوٹ سے گمراہ کرنے والے غدارِ وطن‘ لکھا ہے۔