پاکستان پیپلز پارٹی کے مرکزی رہنما اور چیف میڈیا کوآرڈینیٹر نذیر ڈھوکی انتقال کرگئے ہیں۔

پیپلز پارٹی کی خاتون رہنما شازیہ مری نے چیف میڈیا کوآرڈینیٹر کے انتقال کی تصدیق کرتے ہوئے بتایا کہ نذیرڈھوکی نے بے نظیر بھٹو کی میڈیا ٹیم کے ممبر کی حیثیت سے کام شروع کیا، نذیر ڈھوکی کی خدمات کو پیپلز پارٹی کبھی فراموش نہیں کرے گی۔

دوسری جانب صدر آصف علی زرداری نے بھی نذیر حسین ڈھوکی کے انتقال پر اظہار افسوس کرتے ہوئے مرحوم کی پیپلز پارٹی کے لیے خدمات کو خراج عقیدت پیش کیا۔

صدرمملکت نے مرحوم کے لیے دعائے مغفرت کی اور اہلخانہ کے لیے صبر جمیل کی دعا کی۔

وزیراعلیٰ سندھ سید مراد علی شاہ نے نذیر ڈھوکی کے انتقال پر افسوس کا اظہار کرتے ہوئے کہا کہ انتقال کا سن کر بہت دکھ ہوا، مرحوم نذیر ڈھوکی بہترین انسان اور ایک وفادار جیالے تھے۔