اٹارنی جنرل آف پاکستان منصور اعوان نے کہا ہے کہ مخصوص نشستوں کے حوالے سے سپریم کورٹ کا تفصیلی فیصلہ ابھی نہیں آیا ہے اس لیے اس پر کابینہ میں یا اعلیٰ سطح پر مشاورت نہیں ہوئی ہے۔

میڈیا سے گفتگو کرتے ہوئے اٹارنی جنرل نے کہا کہ سپریم کورٹ نے مختصر فیصلہ جاری کیا ہے۔ حکومت نے ابھی تک اس فیصلے پر نظرِثانی کی اپیل دائر کرنے کا فیصلہ نہیں کیا۔

منصور اعوان کا کہنا تھا کہ ابھی کچھ کہنا مشکل ہے۔ اگر نظرِثانی کی اپیل دائر کرنی ہے تو اس حوالے سے فیصلہ بہت سوچ سمجھ کر کیا جانا چاہیے۔ فیصلے کے بارے میں تو تبادلہ خیال ہوا ہے تاہم نظرِثانی کی اپیل دائر کرنے نہ کرنے کے بارے میں کوئی بات نہیں ہوئی۔