سینئر پاکستانی اداکارہ ریشم جو کہ ہر سال محرام الحرام کی آمد کے موقع پر لنگر کا اہتمام کرتی ہیں۔ اس بار بھی انہوں نے لنگر کے لیے اپنے گھر پر کھانے کی دیگ پکائی مگر بعض سوشل میڈیا صارفین کی جانب سے ان پر تنقید کی گئی۔

اس حوالے سے اداکاہ ریشم نے اپنی ایک ویڈیو کہا کہ گزشتہ 20 برسوں سے اپنے ہاتھوں سے لنگر بنا کر بانٹ رہی ہوں اور یہ سلسلہ گزشتہ 6 برسوں سے مسلسل 12 مہینے چل رہا ہے۔

محکمہ ایکسائز اینڈ ٹیکسیشن اداکارہ ریشم کے پیچھے کیوں پڑ گیا

اداکارہ کا کہنا تھا کہ پہلے وہ ایک دیگ اور روٹیوں کا انتظام 50 ہزار روپے میں کیا کرتی تھیں مگر اب اسی لنگر میں ڈیڑھ لاکھ روپے تک کا خرچہ آتا ہے اور ان کے لنگر میں تین گنا زیادہ اضافہ بھی ہو گیا ہے۔

ریشم نے بتایا کہ ڈراموں اور ماڈلنگ سے جو کماتی ہوں وہ لنگر کے کھانے پر خرچ کردیتی ہوں۔ مگر لوگ میرے اس کام پر انگلیاں اٹھاتے ہیں، اور کہتے ہیں کہ میں یہ غلط کر رہی ہوں اس کے بجائے مجھے لوگوں کو روزگار دینا چاہیے۔

اداکارہ کا کہنا ہے کہ میں کون ہوتی ہوں لوگوں کو کھانا کھلانے والی، رب کی ذات کھلاتی ہے، میرے پاس رہنے کے لیے دنیا میں صرف ایک ہی گھر ہے، اگر میں یہ گھر بیچ کر لوگوں کو روزگار دوں تو خود کیا میں جھگی میں رہوں گی۔

ان کا مزید کہنا تھا کہ میں نے اللہ سے وعدہ کیا ہوا ہے کہ جب تک میں زندہ ہوں لوگوں کے لیے لنگر تیار کرتی رہوں گی۔