استحکام پاکستان پارٹی کے رہنما فیاض الحسن چوہان نے1992ء کے ورلڈ کپ سے متعلق انوکھا دعویٰ کر دیا جس کی ویڈیو وائرل ہوگئی۔

فیاض الحسن چوہان پاکستان تحریک انصاف چھوڑ کر استحکام پاکستان پارٹی میں شامل ہوئے جس کے بعد وہ اکثر عمران خان کی مخالفت میں بیان دیتے دکھائی دیتے ہیں۔

اس بار انہوں نے ایک پوڈ کاسٹ میں انوکھا انکشاف کرتے ہوئے کہا کہ 1992ء کے ورلڈ کپ میں مصنوعی بارش کے ذریعے پاکستانی ٹیم کو جتوایا گیا۔

سوشل میڈیا ایکٹوسٹ فرحان ورک کے پوڈ کاسٹ میں بات کرتے ہوئے فیاض الحسن چوہان نے کہا کہ پاکستانی ٹیم 1992ء کے ورلڈ کپ میں اپنے پہلے 4 میں سے 2 میچز ہار چکی تھی، ایک میں اسے کامیابی ملی تھی اور ایک میچ ڈرا ہوگیا تھا۔

ان کا کہنا تھا کہ وہ ڈرا میچ گولڈ سمتھ کی انگلینڈ نے اس وقت کیا جب پاکستانی ٹیم ٹورنامنٹ سے باہر ہورہی تھی۔فیاض الحسن چوہان کا کہنا تھا کہ انگلینڈ نے مصنوعی بارش کرکے قومی ٹیم کو ورلڈ کپ سے باہر ہونے سے بچایا کیوںکہ پاکستان کی پوری ٹیم تو 74 رنز پر آل آؤٹ ہوچکی تھی اور انگلینڈ نے یہ ٹارگٹ 10 اوورز میں پورا کرلینا تھا، منصوعی بارش برسائی گئی اور پاکستان کو ایک پوائنٹ دیکر آگے بھیجا گیا۔