حکومت کے قانونی امور کے ترجمان بیر سٹر عقیل ملک نے کہا ہے کہ ایک سال انٹرا پارٹی الیکشن نہیں کرائے، اب کس منہ سے مخصوص نشستیں مانگ رہے ہیں۔

اسلام آباد میں نیوز کانفرنس کرتے ہوئے عقیل ملک نے کہا کہ سنی اتحاد کونسل نے نہ ترجیحی فہرست دی۔ نہ کسی نے کاغذات جمع کرائے۔ کس منہ سے مخصوص سیٹیں مانگ رہے ہیں۔

انھوں نے کہا کہ پی ٹی آئی ارکان خانہ بدوش ہیں، اپنی پارٹی ہونے کے باوجود یہ دوسری پارٹی میں گئے۔

ان کا یہ بھی کہنا تھا کہ مخصوص نشستوں کی تناسب کا فارمولا الیکشن کمیشن منگل کو سپریم کورٹ میں دے گا، ان سیٹوں کو خالی نہیں رکھا جاسکتا۔

بیرسٹر عقیل ملک نے مزید کہا کہ یہ بات کلیر ہے سنی اتحاد کونسل والے آزاد امیدوار ہیں، ’مخصوص نشستوں کا فیصلہ ترلے سے نہیں قانون کے مطابق دیا جائے گا‘۔

سنی اتحاد کو مخاطب کرتے ہوئے حکومتی ترجمان نے کہا کہ آپ تسلیم کریں کہ آپ سے قانونی غلطی ہوئی، سپریم کورٹ کے ہر فیصلے کا حکومت احترام کرے گی۔