برطانیہ کے سابق وزیرِ اعظم بورس جانسن ساٹھ سال کے ہوگئے۔ اس موقع پر ان کی اہلیہ نے تحفے میں لکڑی سے بنایا ہوا ہاتھیوں کا خاندان دیا ہے۔ اس تحفے کو انٹرنیٹ پر بہت سراہا جارہا ہے۔

بورس جانسن نے یہ انوکھا تحفہ دیے جانے پر انتہائی مسرت کا اظہار کیا۔ ان کا کہنا تھا کہ میں نے سوچا بھی نہیں تھا کہ ایسا کوئی تحفہ ملے گا۔

لکڑی سے بنایا ہوا ہاتھیوں کا یہ خاندان ایک فلاحی تنظیم کی معاونت کے لیے خریدا گیا ہے۔ دی گریٹ ایلیفینٹ مائیگریشن نامی تنظیم بھارت میں انسانوں اور ہاتھیوں کی پُرامن مشترکہ سکونت کے لیے فعال ہے۔

بھارت کے متعدد جنگلی علاقوں میں ہاتھیوں کے لیے رقبہ گھٹتا جارہا ہے۔ جنگلوں کی کٹائی اور وہاں انسانی آبادی کے قیام سے ہاتھی اپنی قدرتی رہائش سے محروم ہوتے جارہے ہیں۔

کیری جانسن نے شوہر کو تحفے میں دیے گئے یہ لکڑی کے ہاتھی گھر کے باغ میں نصب کردیے ہیں۔ اس کی تصویریں انسٹا گرام پر شیئر کی گئی ہیں۔ ایک تصویر میں بورس جانسن اپنے بچوں کو تھامے ہوئے ہیں۔