عید قرباں میں صرف چند دن ہی باقی رہ گئے ہیں جس کے پیش نظر مویشی منڈیوں میں لوگوں کا تانتا بندھ گیا تاہم جانوروں کی ہوشربا قیمتوں کے ساتھ بیوپاریوں کے نخرے کے باعث عوام وزن کی بنیاد پر بکرے کی خریداری کو ترجیح دے رہے ہیں۔

کراچی میں عید قرباں کی تیاریاں جاری ہیں لوگ مویشیوں کی خریداری میں مصروف ہیں لیکن شہریوں کو بیوپاریوں کی جانب سے منہ مانگے دام اور اس کے ساتھ نخروں نے پریشان کردیا ہے ۔

ایسے میں کراچی کے کئی مقام پر زندہ جانوروں کو تول کر فروخت کرنے کا سلسلہ جاری ہے جس میں شہری بھی خاصی دلچسپی لیتے نظر آرہے ہیں ۔

ضیاالدین چورنگی پر قائم بکروں کی منڈی میں تول کر زندہ بکروں کی فروخت میں تیزی آگئی ، بیوپاری کا کہنا ہے کہ یہاں کوئی مول بھاو نہیں ہوتی لوگ اپنی مرضی سے اپنی پسند کے بکرے کا انتخاب کرتے ہیں اور اسے تول کر فکس ریٹ پر لے جاتے ہیں ۔

بیوپاری نے بتایاکہ نر بکرے 1200 روپے کلو جبکہ خصی بکرے 1300 روپے کلوفروخت کئے جارہے ہیں ، یہ بکرے زیادہ تر اندرون سندھ سے لائے گئے ہیں۔

شہریوں کا کہنا ہے کہ یہاں نہ صرف آسانی سے بکرے کی خریداری ہوجاتی ہے بلکہ بیوپاریوں ناز نخرے بھی نہیں اٹھانا پڑتے ہیں ۔

شہریوں کا کہنا تھا کہ دیگر منڈیوں میں قیمت کو لے کر گھنٹوں بیوپاری سے بحث و تکرار کرنی پڑتی ہے اس کے باوجود بھی وہ دام کم کرنے ہر تیار نہیں ہوتے ہیں ۔