بھارت کے شہر ناگپور سے تعلق رکھنے والے ایک بزنس مین کو بھارتی نژاد امریکی عورت نے نیو یارک اسٹاک ایکسچینج میں سرمایہ کاری کے نام پر 87 لاکھ بھارتی روپے (3 کروڑ 21 لاکھ 90 ہزار پاکستانی روپے) کا چونا لگادیا۔

ناگپور کے 41 سالہ منیش مِشرا نے نیو یارک اسٹاک ایکسچینج کے جس شیئر ٹریڈنگ پلیٹ فارم کے ذریعے سرمایہ کاری کرنے کی کوشش کی وہ جعلی نکلا۔ 87 لاکھ روپے وصول کرنے کے بعد جسلین پرساد ایسے غائب ہوئی جیسے گدھے کے سر سے سینگ۔

فراڈ کا پتا اُس وقت چلا جب بزنس مین سے کہا گیا کہ سیکیورٹی کوڈ کی مد میں مزید 82 لاکھ روپے ادا کرے۔ جسلین پرساد نے منیش مِشرا کو پھانسنے کے لیے غیر معمولی ذہانت کا مظاہرہ کیا اور مختلف حوالے سے بھی دیے۔

منیش مِشرا صرف 10 دن میں 87 لاکھ روپے سے محروم ہوگیا۔ فیس بک پر رابطہ کرنے والی بھارتی نژاد امریکی جسلین پرساد نے نیو یارک اسٹاک ایکسچینج میں معمولی سرمایہ کاری پر غیر معمولی اور فوری منافع کا یقین دلایا تھا۔

منیش مِشرا کے دل و دماغ کو لالچ نے گھیرلیا۔ اُس نے سوچے سمجھے بغیر تین مراحل میں مجموعی طور پر 87 لاکھ روپے کی ’سرمایہ کاری‘ کردی۔

منیش مِشرا امریکی پولیس یا دیگر متعلقہ اداروں میں شکایات بھی درج نہیں کراسکتا کیونکہ اس پورے نام نہاد سودے کے حوالے سے اس کے پاس کوئی دستاویز ہے نہ کوئی رسید۔