عید الاضحٰی کی مناسبت سے محکمہ داخلہ پنجاب نے ہدایات جاری کر دیں جس کے مطابق کالعدم تنظیموں کو قربانی کی کھالیں اکٹھی کرنے کی اجازت نہیں ہوگی جبکہ عوامی مقامات پر سری پائے جلانے اور جانوروں کی باقیات کو مین ہول یا کینال میں پھیکنے پر بھی دفعہ 144 نافذ ہوگی

سیکرٹری داخلہ پنجاب نور الامین مینگل کی زیر صدارت اجلاس میں عید الاضحی کے تناظر میں اہم فیصلے کئے گئے۔ اجلاس میں فیصلہ کیا گیا کہ کسی کالعدم تنظیم کو قربانی کی کھالیں اکٹھی کرنے کی اجازت نہیں دی جائے گی، صرف چیریٹی کمیشن کیساتھ رجسٹرڈ ادارے ہی قربانی کی کھالیں وصول کر سکیں گے۔

علاوہ ازیں عید الاضحیٰ پر عوامی مقامات پر سری پائے جلانے، جانوروں کے فضلے اور اوجھڑی کو مین ہول یا کینال میں پھیکنے پر بھی دفعہ 144 نافذ ہوگی۔ عید کی چھٹیوں میں عارضی نصب ہونے والے مکینیکل جھولوں، دریاؤں، ندی نالوں اور ڈیمز میں نہانے اور کشتی رانی پر پابندی عائد ہوگی۔

سیکرٹری داخلہ نے صوبہ بھر کی عید گاہوں، مساجد اور مدارس میں اضافی سکیورٹی انتظامات کرنے کے علاوہ مری اور گلیات میں سیاحوں کی آمد اور ٹریفک کنٹرول کیلئے ضروری حفاظتی اقدامات یقینی بنانے کی بھی ہدایت کی۔