ایک طرف موسمِ گرما کی شدت بڑھ رہی ہے اور دوسری طرف انتباہ کیا جارہا ہے کہ کراچی میں پانی کا بحران مزید سنگین ہوسکتا ہے۔ واٹر کارپوریشن نے شہریوں سے کہا ہے کہ وہ پانی ذخیرہ کرکے رکھیں اور استعمال میں احتیاط برتیں۔

شہرِ قائد کے مکینوں کو واٹر کارپوریشن کے ترجمان نے بتایا ہے کہ 16 سے 19 مئی کے دوران ترقیاتی کاموں کے باعث پانی کی فراہمی میں کمی واقع ہوسکتی ہے۔ کے الیکٹرک اور واٹر کارپوریشن کے ترقیاتی کاموں کے باعث نیو پمپ ہاؤس گھارو سے پانی کی فراہمی معطل رہے گی۔

پانی کی فراہمی میں تعطل سالانہ ترقیاتی کاموں کے باعث رونما ہوگا۔ اہلِ کراچی کو مجموعی طور پر 13 ایم جی ڈی پانی کم فراہم کیا جائے گا۔

کم و بیش تین دن جاری رہنے والے ترقیاتی کاموں کے باعث گھارو پمپنگ اسٹیشن میں نئے برقی آلات اور پینل نصب ہوں گے۔