پنجاب کی وزیر اعلیٰ مریم نواز نے کہا ہے کہ کنٹینرز اور گاڑیوں کا احتجاج ہی کے لیے نہیں بلکہ علاج کے لیے بھی استعمال کیا جاسکتا ہے۔ ہم پنجاب کو سیاہ دور سے نکال کر ترقی کی طرف لے جارہے ہیں۔

لاہور میں تقریب سے خطاب کرتے ہوئے مریم نواز نے کہا کہ شہباز شریف کو الٹے کاموں کو سیدھا کرنے میں کئی ماہ لگ گئے تھے۔ ہم عوام کو زیادہ سے زیادہ سہولتیں فراہم کرنے کے اقدامات کر رہے ہیں۔

وزیرِ اعلیٰ پنجاب کا کہنا تھا کہ نواز شریف اور شہباز شریف نے خدمت کی سیاست کی بنیاد رکھی۔ ہم جب بھی کوئی منصوبہ لاتے ہیں تو سب سے زیادہ خوشی نواز شریف کو ہوتی ہے۔ کلینک آن وہیکل سے لوگوں کوعلاج کی معیاری سہولت میسر ہوگی۔

مریم نواز کا کہنا تھا کہ کلینک آن وہیکل صرف ایک گاڑی نہیں بلکہ مکمل کلینک ہے جس کے ذریعے لوگ علاج کی معیاری سہولت بہت آسانی سے اور کہیں بھی حاصل کرسکیں گے۔

پنجاب میں متعارف کرائے جانے والے اس خصوصی پروگرام کے تحت 200 میں سے 50 گاڑیوں میں الٹرا ساؤنڈ کی سہولت موجود ہے۔ کلینک آن وہیکل سے 40 لاکھ افراد مستفید ہوں گے۔