ضلع پشین کے علاقے میں مسلح دہشت گردوں کی گاڑی پر فائرنگ سے پولیس افسران پی ڈی ایس پی اور ایس ایچ او شدید زخمی ایک دہشت گرد گرفتار دوسرا فرار ہونے میں کامیاب ہو گیا ہے۔

پولیس کے مطابق جمعرات کی شب بلوچستان کے ضلع پشین کے علاقے کلی تراٹہ میں موٹرسائیکل سوار دو دہشت گردوں نے ایک گاڑی پر جدید اسلحہ سے اندھا دھند فائرنگ کرکے گاڑی میں سوار دو پولیس افسران محکمہ پولیس کے پی ڈی ایس پی عین الدین اور علاقہ ایس ایچ او روزی خان کاکڑ کو شدید زخمی کردیا۔

زخمیوں کو فوری طور پر پشین ہسپتال منتقل کردیا اور فوری طبی امداد کے بعد کوئٹہ ریفر کر دیا گیا۔

پولیس ذرائع کے مطابق مذکورہ افسران ڈیوٹی سرانجام دینے کے بعد پرائیویٹ گاڑی میں گھر کی طرف جاتے ہوئے دہشت گردوں کا نشانہ بنے ایس ایچ او روزی خان کی حالت تشویشناک تھی۔

فائرنگ واقعہ کے بعد ملزمان فرار ہونے میں کامیاب ہوگئے فوری طورپر اطلاع ملنے پر پولیس سی ٹی ڈی اور دیگر قانون نافذ کرنے والے اداروں کے اہلکار موقع پر پہنچ گئے اور پورے علاقے کو گھیرے میں لے کر دہشت گردوں کی تلاش شروع کردی۔

فوری کارروائی کے دوران ایک دہشت گرد گرفتار ہوا جبکہ دوسرا قریبی آبادی سرخاب مہاجر کیمپ میں روپوش ہو گیا جس کی گرفتاری کے لئے فورسز تلاشی لے رہے ہیں۔

پولیس ذرائع کے مطابق گرفتار دہشت گرد جس کا نام محب اللہ معلوم ہوا نے دوران ابتدائی تفتیش بتلایا کے انہیں کالعدم تنظیم نے سپین بولدک سے یہاں بھیجا اور پولیس کو ٹارگٹ کرنے کی ہدایت دی اور فرار دہشت گرد کا نام عبداللہ بتلایا گیا۔

جس کی گرفتاری کے لئے کوششیں جاری ہیں جبکہ سی ٹی ڈی اور دیگر قانون نافذ کرنے والے اداروں نے موقع سے شواہد اکھٹے کیے ہیں۔