سندھ کے کچے کے علاقوں میں صورتِ حال خطرناک حد تک بگڑچکی ہے۔ اغوا برائے تاوان کی وارداتوں میں تیزی سے اضافہ ہوتا جارہا ہے۔

شکار پور کے علاقے رستم میں 2 افراد کو مچھلیوں کے فارم سے اغوا کرلیا گیا۔ اغوا کیے جانے والوں میں میر جاگرانی اور مولا بخش بروہی شامل ہیں۔

اس علاقے میں چند دنوں میں اغوا کیے جانے والوں کی تعداد 10 ہوگئی ہے۔ اغوا کاروں نے فی الحال کوئی مطالبہ سامنے نہیں رکھا تاہم خدشہ ہے کہ ان لوگوں کو تاوان وصول کرنے کے لیے اغوا کیا گیا ہے۔

شکارپور پولیس نے تمام مغویوں کی بحفاظت بازیابی یقینی بنانے کے لیے کچے کے مختلف علاقوں میں سرچ آپریشن شروع کردیا ہے۔