ذرائع نے بتایا ہے کہ متعدد افراد کو محض اس لیے برطرف کیا گیا کہ وہ اسرائیل کے خلاف اور فلسطینیوں کے حق میں کیے جانے والے مظاہروں کے وقت وہاں موجود تھے۔

یاد رہے کہ غزہ میں قتلِ عام رکوانے کے لیے دباؤ ڈالنے کی غرض سے گوگل کے درجنوں ملازمین نے مظاہرہ کرتے ہوئے مطالبہ کیا تھا کہ اسرائیلی حکومت کے ساتھ ایک ارب ڈالر سے زیادہ مالیت کا معاہدہ Nimbus ختم کردیا جائے۔ انہوں نے گوگل کلاؤڈ کے سی ای او ٹامس کوریان کے دفتر کا گھیراؤ بھی کیا تھا۔

ادارے کی انتظامیہ نے یہ مطالبہ تسلیم کرنے سے انکار کرتے ہوئے 28 ملازمین کو برطرف کیا تھا اور ایک میمو کے ذریعے باقی تمام ملازمین کو غزہ کے معاملے میں احتجاج سے گریز کی ہدایت کی تھی۔

گوگل کے ملازمین کے احتجاج کے ساتھ ہی امریکا بھر کی جامعات میں بھی فلسطینیوں کے حق میں مظاہرے شروع کیے۔ طلبہ نے فلسطینیوں کے قتلِ عام پر شدید احتجاج کرتے ہوئے امریکی حکومت سے مطالبہ کیا ہے کہ اسرائیل پر جنگ بندی کے لیے دباؤ ڈالا جائے۔