بھارت کی ریاست گجرات کے شہر آنند میں چاٹ کی دکان چلانے والا انیل بھائی کھٹر بھارتی وزیر اعظم نریندر مودی سے غیر معمولی مشابہت کی بدولت تیزی سے مقبولیت حاصل کر رہا ہے۔ انیل کھٹر کا کہنا ہے کہ میں اور مودی قریب قریب ہیں۔ وہ چائے والے تھے تو میں پانی پوری والا ہوں۔

انیل کھٹر کا صرف چہرہ ہی نریندر مودی سے مشابہ نہیں بلکہ قد کاٹھ بھی ویسا ہی ہے۔ انیل کھٹر نے مودی جیسا ہی لباس بھی اپنالیا ہے۔ دور سے دیکھنے پر کوئی بھی دھوکا کھاسکتا ہے۔ انیل کھٹر کرتا اور چوڑی دار پاجامہ پہنتا ہے اور اس پر نہرو جیکٹ پہنتا ہے۔ انیل کھٹے کے بھی بال سفید ہیں اور داڑھی خاصی چھوٹی ہے۔

انیل کھٹر کے گیٹ اپ سے متاثر ہوکر بہت سے لوگ اس کی دکان پر آتے ہیں اور اس کے ساتھ سیلفیاں بھی لیتے ہیں۔ انیل کھٹر کو مقبولیت سے ہم کنار کرنے میں گجرات کے شہر بڑودہ سے تعلق رکھنے والے ایک فوڈ بلاگر نے کلیدی کردار ادا کیا ہے۔ اُسی نے انیل کھٹر کی ویڈیو اپ لوڈ کی جو وائرل ہوئی۔

انیل بھائی کھٹر کی دکان کا نام ہے“تلسی پانی پوری“ ہے۔ یہ دکان بُھدیوی کمپلیکس، ولبھ ودیا نگر، گجرات میں واقع ہے۔ انسٹاگرام پر وائرل ہونے والی ویڈیو پر لکھا تھا مودی جی کا ہم شکل پانی پوری بیچ رہا ہے۔