بالی وڈ کے معروف اداکار پنکج ترپاٹھی کے بہنوئی جھاڑ کھنڈ میں سڑک کے حادثے میں ہلاک ہوگئے۔ پنکج ترپاٹھی کی بہن اس حادثے میں شدید زخمی ہوئی ہے۔ یہ لوگ بہار کے ضلع گوپال گنج سے مغربی بنگال جارہے تھے۔

یہ حادثہ ہفتے کی شام ساڑھے چار بجے دلی کولکتہ نیشنل ہائی وے پر نِرسا بازار کے نزدیک دھنباد کے مقام پر ہوا۔ پنکج ترپاٹھی کی بہن سبیتا تِواری اور بہنوئی راکیش تِواری جس کار میں سوار تھے وہ ایک روڈ ڈیوائڈر سے جا ٹکرائی۔

میاں بیوی کو تشویش ناک حالت میں دھنباد کے نرمل مہتو میڈیکل کالج اسپتال لے جایا گیا جہاں ڈاکٹرز نے بتایا کہ راکیش تِواری دم توڑ چکے ہیں۔ ڈاکٹر دنیش کمار گِنڈوریا نے بتایا کہ پنکج کی بہن کی ٹانگ میں فریکچر ہے اور اس کی حالت خطرے سے باہر ہے۔

پنکج ترپاٹھی کا شمار بالی وڈ کے کامیاب اداکاروں میں ہوتا ہے۔ وہ نیشنل ایوارڈ بھی جیت چکے ہیں۔ میں اٹل ہوں، او مائی گاڈ پارٹ ٹو، استری، لوڈو، میمی اور گینگز آف واسع پور ان کی کامیاب ترین فلمیں ہیں۔ انہوں نے ویب سیریز مرزاپور میں بھی شاندار پرفارمنس دی تھی۔