بالی ووڈ کے معروف اداکار عامر خان اپنی ایک جعلی ویڈیو پر بھڑک اٹھے ہیں جس میں انہیں ایک خاص سیاسی جماعت کو پروموٹ کرتے دکھایا گیا ہے۔

عامر خان نے اس حوالے سے جاری اپنے وضاحتی بیان میں کہا کہ انہوں نے سوشل میڈیا پر وائرل اس جعلی ویڈیو کے خلاف قانونی کارروائی کا آغاز کردیا ہے۔

اداکار نے یہ بھی واضح کیا کہ انہوں نے اپنے پورے کیریئر میں کبھی کسی سیاسی جماعت کی حمایت نہیں کی۔

عامر کے ترجمان کی جانب سے جاری بیان میں کہا گیا کہ ’حالیہ وائرل ویڈیو پریشان کُن ہے، جس میں الزام لگایا گیا ہے کہ عامر خان ایک مخصوص سیاسی جماعت کو پروموٹ کر رہے ہیں۔‘

ترجمان کی جانب سے جاری بیان میں کہا گیا کہ ہم یہ واضح کرنا چاہتے ہیں کہ یہ ایک جعلی اور بے بنیاد ویڈیو ہے، ہم نے اس معاملے پر قانونی کارروائی کا آغاز کردیا ہے اور ممبئی پولیس کے سائبر کرائم سیل میں ایف آئی آر درج کروا دی گئی ہے’۔

بیان میں یہ بھی کہا گیا کہ عامر خان نے کبھی بھی کسی سیاسی جماعت کی حمایت نہیں کی لیکن وہ ہندوستانیوں پر زور دیتے ہیں کہ وہ آنے والے لوک سبھا انتخابات میں ووٹ دیں۔

ترجمان کی جانب سے جاری بیان میں کہا گیا کہ ’ہم واضح کرنا چاہتے ہیں کہ مسٹر عامر خان نے اپنے 35 سالہ کیریئر میں کبھی کسی سیاسی جماعت کی حمایت نہیں کی۔ انہوں نے گزشتہ کئی انتخابات کے لیے الیکشن کمیشن کی مہم کے ذریعے عوام میں شعور بیدار کرنے کے لیے اپنی کوششیں کی ہیں‘۔

یہ بھی کہا گیا کہ عامر خان اس بات پر زور دیتے ہیں کہ عام انتخابات میں باہر آئیں اور ووٹ ڈالیں اور ہمارے انتخابی عمل کا ایک فعال حصہ بنیں۔