کراچی میں اسٹریٹ کرائم کی بڑھتی ہوئی وارداتوں کے خلاف احتجاج کرتے ہوئے مظاہرین نے سُپرہائی وے بلاک کردیا تاہم پولیس سے مذاکرات کے بعد سپر ہاٸی وے کو ٹریفک کے لیے کھول دیا گیا۔

پولیس کے مطابق کراچی میں سپرہائی وے پر سبزی منڈی کے قریب ڈکیتی کی واردات ہوئی، صبح کے وقت سوزوکی میں سوار شہری سے لوٹ مار ہوئی، شہری کے مطابق ملزمان دو لاکھ سے زائد رقم لوٹ کر فرار ہوئے ہیں۔

پولیس کا کہنا ہے کہ شہری قرض کی رقم ادا کرنے سبزی منڈی جارہا تھا، پولیس حکام کچھ دیر میں احتجاج کے مقام پر پہنچ رہے ہیں، مظاہرین سے مذاکرات کیے جائیں گے۔

شہر قائد میں بڑھتی ہوئی وارداتوں کے خلاف سپر ہائی وے پر احتجاج جاری ہے، احتجاج تاجروں اور علاقہ مکینوں کی جانب سے کیا جارہا ہے۔

احتجاج کے دوران مظاہرین نے ٹریکس بند کردیے، سڑک بند ہونے کے باعث گاڑیوں کی لمبی قطاریں لگ گئیں۔

متاثرین اور پولیس کے درمیان کٸی گھنٹے مذاکرات کے بعد سپر ہاٸی وے کو ٹریفک کے لیے کھول دیا گیا۔