وزیر خارجہ اسحاق ڈار کو کابینہ کمیٹی برائے نجکاری کا چئیرمین مقرر کئے جانے پر ہونے والی تنقید کے جواب میں پاکستان مسلم لیگ (ن) کے رہنما بلال اظہر کیانی کا کہنا ہے کہ کابینہ کمیٹیز کی تشکیل وزیراعظم کا اختیار ہوتا ہے۔

وزیراعظم شہباز شریف نے وزیر خارجہ اسحاق ڈار کو کابینہ کمیٹی برائے نجکاری چیئرمین مقرر بنایا ہے، جبکہ عام طور پر یہ عہدہ وزیر خزانہ کے پاس رہتا ہے۔

وزیراعظم کے اس فیصلے پر تنقید ہو رہی ہے اور نقادوں کا کہنا ہے کہ اس کے نتیجے میں وزیر خزانہ کے اختیارات محدود کیے گئے ہیں۔

تاہم، اس حوالے سے آج نیوز کے پروگرام ”اج ایکسکلیوسیو“ میں گفتگو کرتے ہوئے بلال اظہر کیانی کا کہنا تھا کہ اقتصادی رابطہ کمیٹی وزیراعظم خود چیئر کریں گے، وزیراعظم کا خود ای سی سی کو دیکھنا خوش آئند ہے۔

ایک سوال کے جواب میں بلال اظہر کیانی نے کہا کہ وزیر خزانہ اپنے فیصلوں میں بااختیار ہیں، وزیر خزانہ کےفیصلوں میں کوئی مداخلت نہیں کررہا۔

ان کا کہنا تھا کہ کابینہ کا ہر ممبر وزیراعظم کی منظوری سے لگا ہے۔