مراکش سے تعلق رکھنے والے فٹبالر اشرف حکیمی کی سابق اہلیہ نے علیحدگی کے ایک سال بعد خاموشی توڑ دی ہے۔

فیفا ورلڈ کپ 2022 میں اپنی کارکردگی کے باعث سب کی توجہ حاصل کرنے والے مراکش کے فٹبالر اشرف حکیمی کی سابق اہلیہ حبہ ابوق نے باقاعدہ طور پر اپنے اور فٹبالر کے درمیان علیحدگی پر تبصرہ کیا ہے۔

غیر ملکی میڈیا سے گفتگو میں حبہ کا کہنا تھا کہ خیانت محبت کو ختم کر دیتی ہے، سابق اہلیہ نے مختلف چیزوں پر بات کی تھی۔

37 سالہ ماڈل کا کہنا تھا کہ طلاق سمیت مختلف لمحات ان کی زندگی کے مشکل ترین لمحات تھے۔

رپورٹر کے سوال پر حبہ کا کہنا تھا کہ آپ کو بہت دیر تک چیزوں کو سوچنا اور سمجھنا ہوتا، اس پر مباحثہ کرنا ہوتا، بعدازاں نتیجہ نکلتا ہے، لیکن دھوکہ محبت کو مار ڈالتا ہے۔

حبہ نے انکشاف کیا کہ انہوں نے کئی مرتبہ فٹبالر کو معاف کیا تھا، تاہم ’ یہ میرے لیے مشکل ترین فیصلہ تھا، کیونکہ میں نے اپنے والدین اور خاندان کے لیے سب کچھ چھوڑ دیا تھا، میں اپنے شوہر کو چھوڑ چکی ہوں، اور اب ایک نئی زندگی کی طرف جانے کی کوشش کر رہی ہوں’۔

واضح رہے مراکش ٹیم کے فٹبالر اشرف حکیمی اور حبہ ابوق کی شادی 2020 میں ہوئی تھی، جبکہ دونوں کے 2 بچے امین اور نعیم بھی ہیں، تاہم 2023 میں ایک خاتون نے فٹبالر پر زیادتی کا الزام عائد کیا تھا، جس کے بعد دونوں کے درمیان علیحدگی ہو گئی تھی۔

دوسری جانب غیر ملکی میڈیا کے مطابق طلاق کے بعد حبہ نے سابق شوہر سے 11 ملین ڈالرز نان نفقہ مانگا تھا، جبکہ سابق شوہر نے 2 اعشاریہ 2 ملین ڈالرز دینے کی پیشکش کی تھی۔

تاہم اس خبر نے سب کو حیران کر دیا تھا کہ فٹبالر نے اپنی ساری جائیداد اپنی والدہ کے نام کر دی ہے، جس پر سابق اہلیہ نے عدالت سے رجوع کیا تھا، جس میں موقف اختیار کیا تھا کہ سابق شوہر نے فراڈ اور ازدواجی جائیداد سے متعلق بد انتظامی کی ہے۔

جائیداد والدہ کے نام منتقل کرنے پر والدہ کا موقف بھی سامنے آیا تھا، والدہ کا کہنا تھا کہ مجھے علم نہیں ہے کہ میرے بیٹے نے کب اپنی جائیداد میرے نام کی ہے، اگر اس نے ایسا کیا ہے، تو اس عورت سے جان چھڑانے کے لیے کیا ہوگا۔