آڈیو لیک کے معاملے پر ایف آئی اے نے سنی اتحاد کونسل کی رکن قومی اسمبلی شاندانہ گلزار کو 14 مارچ کو لاہور طلب کر لیا۔ پاکستان مسلم لیگ (ن) کی رہنما عظمیٰ بخاری نے کہا ہے کہ شاندانہ گلزار مریم نواز کی آڈیو کا ثبوت دیں ورنہ قانون کا سامنا کریں۔

شاندانہ گلزار نے مبینہ طور پر وزیراعلیٰ پنجاب پر آڈیو لیک کا الزام عائد کیا تھا۔

مبینہ آڈیو لیک میں پی ٹی آئی کے مقتول کارکن ظل شاہ کا ذکرکیا تھا۔

ن لیگ کے کارکن شعیب مرزا کی درخواست پر شاندانہ گلزار کو ایف آئی اے نے طلب کیا ہے۔

لیگی رہنما عظمیٰ بخاری نے لاہور میں میڈیا سے گفتگو میں کہا کہ شاندانہ گلزار پاکستان کےخلاف ہرزہ سرائی کرنے میں مصروف ہیں، یہ نہ پی ٹی آئی رکن ہیں اور نہ ہی سنی اتحاد کی۔

انھوں نے کہا کہ اسمبلی کے تقدس کا خیال رکھنا سب ارکان کا فرض ہے، اداروں کےخلاف ہرزہ سرائی کرنے والوں کو برداشت نہیں کیا جائے گا۔

عظمیٰ بخاری نے کہا کہ شاندانہ گلزار نے وزیر اعلیٰ پنجاب مریم نواز پر الزام لگایا ہے کہ ان کی کوئی آڈیو ہے، شاندانہ گلزار آڈیو لیکر آئیں اور ثبوت پیش کریں۔

لیگی رہنما نے کہا کہ شاندانہ گلزار ثبوت دیں ورنہ قانون کا سامنا کریں، اب ایسا نہیں ہوگا کہ جس کا جو دل کرے وہ الزام لگا دے۔