پتوکی میں چوری کے الزام میں نوجوان کو کھمبے کے ساتھ باندھنے والے ملزمان کو گرفتار کرلیا گیا ہے، پولیس نے ملزمان کے خلاف مقدمہ بھی درج کرلیا ہے۔

پتوکی میں نشاط روڈ پر چوری کے الزام میں دوکانداروں نے اپنی عدالت لگاتے ہوئے نوجوان کاشف علی کو بجلی کے پول سے باندھ دیا۔

باندھنے والوں نے الزام عائد کیا کہ نوجوان نے ہمارا سامان چرایا ہے۔

ویڈیو وائرل ہونے پر تھانہ سٹی پتوکی پولیس حرکت میں آئی اور چار ملزمان کو گرفتار کرلیا۔

ایس ایچ او تھانہ سٹی پتوکی اسلم بھٹی کا کہنا ہے کہ کسی کو قانون ہاتھ میں لینے کی اجازت نہیں دیں گے، معاملے کی تحقیقات کے ساتھ ساتھ دیگر ملزمان کی گرفتاری کے لیے چھاپے مارے جارہے ہیں۔