پاکستان تحریک انصاف کے رہنما عمر ایوب خان نے سابق خاتون اول بشریٰ بی بی کی جیل میں خراب طبعیت پر تشویش کا اظہار کر دیا، بشریٰ بی بی سے متعلق ان کی بہن نے الزام عائد کیا تھا کہ بشریٰ کو جیل میں ناقص کھانا فراہم کیا جا رہا ہے۔

عمر ایوب خان کی جانب سے کہنا تھا کہ اڈیالہ جیل میں ناقص کھانا دیے جانے کے باعث بشریٰ بی بی کی طبعیت ناساز ہے۔

رہنما کا مزید کہنا تھا کہ اگر انہیں کچھ بھی ہوا تو اس کی ذمہ دار اڈیالہ جیل حکام اور حکومت ہوگی، بشریٰ بی بی خان صاحب کی سپورٹ میں ستون کی طرح کھڑی ہیں میں انہیں خراج تحسین پیش کرتا ہوں۔

واضح رہے پاکستان تحریک انصاف کے بانی عمران خان کی جانب سے عمر ایوب خان کو پی ٹی آئی کی طرف سے وزیر اعظم کے امیدوار کے لیے نامزد کیا گیا تھا۔

دوسری جانب بشریٰ بی بی کی بیٹی کی جانب سے الزام عائد کیا گیا تھا انہیں ناقص کھانا دیا گیا ہے، جس کے باعث انہیں معدے میں تکلیف اور گلے میں جلن کی شکایت تھی۔

بشریٰ بی بی کی جانب سے اڈیالہ جیل منتقلی سے متعلق اسلام آباد ہائیکورٹ سے رجوع کیا گیا تھا، درخواست میں موقف اختیار کیا گیا تھا کہ 31 جنوری کو صبح 10 سے رات 9 بجے انتظار کرانے کے بعد بنی گالہ کو ہی سب جیل قرار دے دیا گیا۔

درخواست میں موقف اختیار کیا گیا کہ 31 جنوری کا چیف کمشنر آف کے نوٹیفیکیشن کو کلعدم قرار دیا جائے۔