بھارت کے ایک مسلم رہنما نے اتر پردیش کے وزیر اعلٰی یوگی آدتیہ ناتھ کو خبردار کیا ہے کہ وہ بنارس کی گیان واپی مسجد میں پوجا کی اجازت دے کر بدامنی کی راہ ہموار نہ کریں۔

بنارس کی گیانی واپی مسجد کو واگزار کرانے کے حوالے سے کولکتہ میں جمیعت علمائے ہند کے تحت ایک ریلی سے خطاب کرتے ہوئے ترنمول کانگریس کے رہنما صدیق اللہ چودھری نے کہا کہ گیان واپی مسجد سمیت کسی بھی مسجد میں پوجا سے ہندوؤں کو گریز کرنا چاہیے۔ مسلمان کبھی عبادت کے لیے کسی مندر میں قدم نہیں رکھتے۔

صدیق اللہ چودھری نے کہا کہ یوگی آدیتہ کو دوسرے مذاہب کی عبادت گاہوں کا احترام کرنا چاہیے۔ گیان واپی مسجد میں مورتیاں رکھ کر پوجا کرانے سے حالات خراب ہوں گے۔ اگر یوگی آدتیہ ناتھ کبھی (مغربی) بنگال آئے تو ان کا گھیراؤ کیا جائے گا۔

واضح رہے کہ بنارس کی ایک عدالت نے گزشتہ ہفتے گیان واپی مسجد میں پوجا کی اجازت دی تھی۔ صدیوں پرانی اس مسجد پر ہندوؤں کا دعویٰ ہے۔