سابق ایڈووکیٹ جنرل خیبرپختونخوا شمائل بٹ کا کہنا ہے کہ آزاد امیدوار اپنا وزیراعلیٰ بنانے کے ساتھ ساتھ حکومت بھی بناسکتے ہیں، تاہم آزاد امیدواروں کو مخصوص نشستیں نہیں مل سکیں گی۔

آج نیوز کے ساتھ گفتگو کرتے ہوئے شمائل بٹ نے کہا کہ مخصوص نشستیں اسمبلی میں موجود جماعتوں میں ہی تقسیم ہوں گی۔

لیکن اگر آزاد امیدوار کسی جماعت میں شامل ہوجاتے ہیں تو اس جماعت کو اس حساب سے ہی مخصوص نشستیں ملیں گی۔

خیال رہے کہ قومی اور صوبائی اسمبلیوں کی جنرل نشستوں پر انتخابات کے بعد اب اگلا مرحلہ سیاسی جماعتوں کو مخصوص نشستیں دیئے جانے کا ہے جس کے بعد ان کی نشستوں کی مجموعی تعداد بڑھ جائے گی اور اس تعداد کی بنیاد پر ہی اکثریت رکھنے والی جماعتیں حکومتیں بنائیں گی۔

آئندہ حکومت کی تشکیل کا بڑا انحصار اس بات پر بھی ہے کہ مخصوص نشستوں کی تقسیم کیسے ہوتی ہے۔