اسلام آباد کی ڈسٹرکٹ اینڈ سیشن کورٹ نے فراڈ کیس میں سابق وفاقی وزیر اطلاعات فواد چوہدری کی ضمانت منظور کرلی۔

دسٹرکٹ اینڈ سیشن کورٹ کے سول جج ڈاکٹر سہیل نے فراڈ کیس میں استحکام پاکستان پارٹی کے رہنما فواد چوہدری کی درخواست ضمانت پر محفوظ فیصلہ سنا یا۔

عدالت نے فواد چوہدری کی ضمانت بعد از گرفتاری منظور کرلی، سول جج ڈاکٹر سہیل نے فواد چوہدری کی ضمانت ایک لاکھ روپے مچلکوں کے عوض منظور کی۔

گزشتہ روز اسلام آباد کی ڈسٹرکٹ اینڈ سیشن کورٹ نے فراڈ کیس میں سابق وفاقی وزیر فواد چوہدری کی درخواست ضمانت پر فیصلہ محفوظ کیا تھا جبکہ فواد چوہدری کی جانب سے گزشتہ روز وکیل قیصر امام نے دلائل دیے تھے۔

واضح رہے کہ پی ٹی آئی کے دور حکومت میں فواد چوہدری وفاقی وزیر اطلاعات رہے ہیں، فواد چوہدری پر شہری سے 50 لاکھ روپے لے کر نوکری نہ دینے کا الزام ہے اور ان کے خلاف تھانہ آبپارہ میں مقدمہ درج ہے۔