پشاور میں تحریک انصاف کی کور کمیٹی کا اہم اجلاس ہوا۔ جس میں کہا گیا کہ عوام کے مسترد شدہ مجرموں سے ہاتھ ملانے کی بجائے ووٹ کی پرچی کے ذریعے کئے گئے عوام کے فیصلے کا مکمل احترام کیا جائے۔

اجلاس میں مرکز، پنجاب اور خیبرپختونخوا میں پی ٹی آئی کو ملنے والی کامیابی کے باعث حکومت سازی کی حکمتِ عملی پر تفصیلی تبادلہ خیال کیا گیا۔

حکومت سازی کیلئے نومنتخب اراکین قومی اسمبلی سے باضابطہ روابط کی ذمہ داری بیرسٹر عمیر خان نیازی کے سپرد کی گئی۔

علی امین گنڈا پور خیبرپختونخوا جبکہ میاں اسلم اقبال بالترتیب خیبر پختونخوا اور پنجاب میں نومنتخب اراکین صوبائی اسمبلی سے روابط کا فریضہ سرانجام دیں گے۔

کورکمیٹی نے کہا کہ لندن منصوبے کے تحت وطن واپس لائے گئےعوام کے مسترد شدہ فرد کے کامیابی کے جھوٹے دعوے شرمناک ہیں۔

کورکمیٹی نے کہا کہ الیکشن کمیشن کے ہاتھوں انتخابات کی تباہ شدہ ساکھ پر بین الاقوامی سطح پر پیدا ہونے والا ردّعمل فطری اور قابلِ فہم ہے۔

پی ٹی آئی کورکمیٹی نے کہا کہ انتخابات کے حوالے سے عالمی سطح پر ابھرنے والی تشویش کا دفترِخارجہ کی پریس ریلیز سے تدارک کی کوشش مضحکہ خیز ہے۔

کورکمیٹی کےمطابق دستور و قانون کے احترام اور شفافیت کے تقاضوں کو ملحوظِ خاطر رکھ کر ہی انتخابات کو مؤثر اور قابلِ قبول بنایا جاسکتا تھا۔