بالی وڈ کے معروف سینیر اداکار اور حکمراں بھارتیہ جنتا پارٹی کے رہنما متھن چکرورتی کو سینے میں تکلیف محسوس ہونے پر کولکتہ کے اسپتال میں داخل کرادیا گیا۔

ذرائع نے بتایا ہے کہ متھن چکرورتی کو انتہائی نگہداشت کے شعبے میں رکھا گیا ہے اور ڈاکٹرز کی ایک ٹیم ان کے علاج میں مصروف ہے۔

ذرائع کا کہنا ہے کہ جمعہ کی رات ہی سے وہ شدید بے چینی محسوس کر رہے تھے۔ ہفتے کی صبح ان کی حالت خراب ہونے لگی تو فوری طور پر اسپتال لے جایا گیا۔

متھن چکرورتی کو حال ہی میں ملک کا دوسرا بڑا سول اعزاز پدما بھوشن سے نوازا گیا ہے۔

پدما بھوشن دیے جانے کے بعد متھن چکرورتی نے بنگالی زبان میں ایک وڈیو میں کہا تھا کہ میہ میرے لیے بہت خوشی کی بات ہے۔ اس اعزاز کو پانا میرے لیے بہت فخر کی بات ہے۔ ان کا کہنا تھا کہ میں ان سب کا شکر گزار ہوں جو مجھ سے محبت اور میرے لیے دعا کرتے ہیں۔ میں اپنے لیے کبھی کچھ نہیں چاہتا، کچھ نہیں مانگتا۔