امریکی صدر جو بائیڈن میڈیا سے گفتگو کے دوران اسرائیل کے حوالے سے بات کرتے ہوئے حماس کو اپوزیشن کہہ گئے۔ توجہ دلائے جانے پر انہوں نے فوراً تصحیح کی۔

امریکی صدر سے یرغمالیوں کی رہائی کے حوالے سے بات چیت کے بارے میں استفسار کیا گیا تھا۔

جو بائیڈن کی پریس کانفرنس کو، جو نئے بارڈر سیکیورٹی بل کو متعارف کرانے پر اُن کے لیے خطاب کے بعد ہوئی، سوشل میڈیا اور مین اسٹریم میڈیا پر بہت بڑے پیمانے پر شیئر کیا گیا۔

امریکی صدر سے جب پوچھا گیا کہ غزہ میں یرغمال بناکر رکھے گئے اسرائیلی شہریوں کو چھڑانے کے حوالے سے بات چیت کہاں تک پہنچی ہے تو انہوں نے کہا کہ ’اپوزیشن‘ کی طرف سے کوئی ریسپانس نہیں ملا ہے۔

اس موقع پر وہ بوکھلا گئے اور کہاں کہ کوئی تحریک ہے جس کی طرف سے جواب نہیں ملا۔ دو بار تحریک کا ذکر کرنے پر انہیں حماس کا نام یاد نہ آیا۔

اس موقع پر ایک رپورٹر نے حماس کا نام لیا تو جو بائیڈن نے کہا ہاں ہاں، میں اسی کی بات کر رہا تھا۔