کراچی کی احتساب عدالت نے 17 ارب روپے کی کرپشن کیس میں پیپلز پارٹی کے رہنما ڈاکٹر عاصم کو بیرون ملک جانے کی اجازت دے دی۔

احتساب عدالت کراچی میں ڈاکٹرعاصم و دیگر کے خلاف 17 ارب روپے کی کرپشن سے متعلق ریفرنس کی سماعت ہوئی، ڈاکٹرعاصم حسین و دیگر ملزمان عدالت میں پیش ہوئے۔

عدالت نے ڈاکٹرعاصم کو بیرون ملک جانے کی اجازت دے دی۔ ڈاکٹرعاصم نے 15 فروری سے 30 مارچ تک بیرون ملک جانے کی درخواست دائر کی تھی۔

درخواست میں ڈاکٹرعاصم کی جانب سے استدعا کی گئی کہ علاج کے لیے بیرون ملک جانا ہے باہر جانے کی اجازت دی جائے۔

عدالت نے ڈاکٹرعاصم و دیگر کے خلاف ریفرنس واپس نیب کو بھیجنے کی درخواست پر فیصلہ محفوظ کرتے ہوئے کہا کہ 17 ارب روپے کی کرپشن سے متعلق ریفرنس واپس نیب کو بھیجے کی درخواست پر فیصلہ 15 فروری کو سنایا جائے گا۔

نیب کا کہنا ہے کہ ملزمان پر گیس کے ٹھیکوں کی مد میں قومی خزانے کو 17 ارب روپے نقصان پہنچانے کا الزام ہے۔

یاد رہے کہ ملزمان کے خلاف نیب نے 2016 میں ریفرنس دائر کیا تھا۔