آزاد کشمیر میں بارش اور پہاڑوں پر برفباری کا نیا سلسلہ شروع ہوچکا ہے، جس کے باعث وادی لیپہ اور وادی نیلم کے جنگلات میں لگی آگ بجھ گئی ہے۔

بارش سے آزاد کشمیر میں طویل عرصہ سے جاری خشک سالی کا راج بھی ختم ہوگیا ہے۔

بارش اور برفباری کے باعث آزاد کشمیر کے شہری اور دیہی علاقےسردی کی لپیٹ میں ہیں۔

وادی لیپہ، وادی نیلم اور جہلم ویلی کی بلند چوٹیوں نے برف کی سفید چادر اوڑھ لی ہے، جبکہ فضا میں چھائی آلودگی کے بادل چھٹ گئے ہیں۔

موسم سرد ہونے کے بعد مظفرآباد شہر اور نواحی علاقوں میں یخ بستہ ہوائیں چل پڑی ہیں، سردی میں اچانک اضافے نے شہریوں کی مشکلات بڑھا دی ہیں۔

پشاور میں بارش

دوسری جانب پشاور میں ہلکی بارش سے موسم مزید سرد ہوگیا۔

محکمہ موسمیات کے مطابق بارش کا یہ سلسلہ 31 جنوری تک وقفے وقفے سے جاری رہنے کا امکان ہے۔

چترال، سوات، مانسہرہ ،چارسدہ، مردان، صوابی، خیبر، باجوڑ اور بنوں میں آج بارش متوقع ہے۔ جبکہ پہاڑوں پر برفباری کا بھی امکان ہے۔

محکمہ موسمیات کے مطابق کالام میں درجہ حرارت منفی 7 ڈگری سینٹی گریڈ ریکارڈ کیا ہے، مالم جبہ میں منفی 3، دیر منفی 2 اور چترال منفی ایک ڈگری سینٹی گریڈ ریکارڈ کیا گیا ہے۔

پشاور میں کم سے کم درجہ حرارت 4ڈگری سینٹی گریڈ ریکارڈ کیا گیا۔