پاکستان کرکٹ ٹیم کے سابق کپتان شعیب ملک نے بنگلادیش پریمیئر لیگ میں میچ فکسنگ کے الزامات پر خاموشی توڑ دی۔

شعیب ملک کا بی پی ایل فرنچائز فارچیون بریشال کے ساتھ معاہدہ تھا تاہم وہ 2 روز قبل بنگلادیش سے دبئی چلے گئے تھے۔

اب سماجی رابطے کی ویب سائٹ ایکس (ٹوئٹر) پر جاری بیان میں شعیب ملک نے کہا کہ فارچیون بریشال کے ساتھ اپنی پلیئنگ پوزیشن کے بارے میں گردش کرنے والی افواہوں کو مسترد کرتا ہوں، میں نے کپتان تمیم اقبال کے ساتھ مکمل بات چیت کی اور پھر ہم باہمی طور پر آگے بڑھے۔

شعیب ملک نے بتایا کہ دبئی میں پہلے سے طے مصروفیت کی وجہ سے مجھے بنگلادیش چھوڑنا پڑا۔

انہوں نے اپنے بیان میں بی پی ایل کی ٹیم کے لیے نیک تمناؤں کا اظہار کرتے ہوئے لکھا کہ اگر ضرورت پڑی تو میں ٹیم کے لیے دستیاب ہوں۔

شعیب ملک نے اپنے پیغام میں بنگلادیش پریمیئر لیگ کے حوالے سے پھیلائی جانے والی افواہوں پر احتیاط برتنے کی اہمیت پر زور دیا اور کہا کہ میں واضح طور پر ان بے بنیاد افواہوں کی سختی سے تردید کرتا ہوں۔

انہوں نے سوشل میڈیا پر اپنے پیغام میں لکھا کہ ہر کسی کے لیے معلومات پر یقین کرنے اور پھیلانے سے پہلے اس کی تصدیق کرنا بہت ضروری ہے، جھوٹ ساکھ کو نقصان پہنچا سکتا ہے اور یہ غیر ضروری الجھن پیدا کر سکتا ہے۔