بھارت کی جنوبی ریاست تامل ناڈو کے وزیر اعلٰی ایم کے اسٹالن نے بین المذاہب ہم آہنگی کے حوالے سے گراں قدر خدمات انجام دینے پر محمد زبیر کو ریاست کے خصوصی ایوارڈ سے نوازا ہے۔ AltNews کے شریک بانی محمد زبیر کو فیکٹ چیکنگ کے شعبے میں گراں قدر حیثیت کا حامل قرار دیا گیا ہے۔

تامل ناڈو کے وزیر اعلٰی ایم کے اسٹالن کا کہنا ہے کہ محمد زبیر نے فیکٹ چیکنگ کے شعبے میں اہم خدمات انجام دی ہیں۔ حقائق عوام تک پہنچاکر انہوں نے فرقہ وارانہ کششیدگی اور تشدد کی راہ مسدود کرنے میں کلیدی کردار ادا کیا ہے۔ سوشل میڈیا میں پھیلائی جانے والی گمراہ کن پوسٹس اور وڈیوز کی روک تھام میں محمد زبیر اور ان کی ٹیم کا گراں قدر کردار ہے۔

تامل ناڈو کی حکومت نے کہا ہے کہ مارچ 2023 میں سوشل میڈیا پر یہ افواہ پھیلائی گئی کہ ریاست میں غیر مقامی یعنی دیگر ریاستوں سے آئے ہوئے محنت کشوں پر حملے ہو رہے ہیں۔

حقائق تک رسائی ممکن بناکر محد زبیر نے آلٹ نیوز پر بتایا کہ اس حوالے سے جو کچھ بھی کہا جارہا تھا وہ گمراہ کن تھا اور متعلقہ وڈیو میں جو کچھ بھی دکھایا گیا وہ تامل ناڈو میں ہوا ہی نہیں تھا۔

تامل ناڈو حکومت نے کوٹائی امیر کمیونل ہارمنی ایوارڈ 2000 میں شروع کیا تھا۔ اس ایوارڈ کے ساتھ ایک میڈل، پچیس ہزار روپے اور صداقت نامہ دیا جاتا ہے۔

محمد زبیر تامل کے ضلع کرشنا گری کے تعلقہ دھین کونی کوٹائی کے رہائشی ہیں۔