بھارت کے شہر بھوپال میں ہنی مون کے معاملے پر ایک نوبیاہتا جوڑا طلاق کے دہانے پر پہنچ گیا ہے۔

نوبیاہتا جوڑے کا تعلق بھارت کی وسطی ریاست مدھیہ پردیش سے ہے۔ دولہا نے وعدہ کیا تھا کہ ہنی مون گوا میں منائیں گے مگر وہ دلہن کو ایودھیا لے گیا اور رام مندر میں پوجا کی۔

بھوپال کی فیملی کورٹ میں دائر کیے جانے والے طلاق کے کیس میں دلہن نے یہ موقف اختیار کیا ہے کہ دولہا نے اس کے اعتماد کو ٹھیس پہنچائی ہے۔ اس کا یہ بھی کہنا ہے کہ شادی کے بعد سے اب تک شوہر اپنے گھر والوں کی مرضی اور خوشی کو ترجیح دیتا آیا ہے۔

شادی اگست میں ہوئی تھی۔ دولہا کا تعلق انفارمیشن ٹیکنالوجی کے شعبے سے ہے۔ اس نے شادی سے قبل وعدہ کیا تھا کہ ہنی مون گوا میں منائیں گے۔

دولہا کا کہنا ہے کہ اس نے ہنی مون کے لیے ایودھیا جاکر رام مندر میں پوجا اس لیے کی کہ اس کے والدین اور خاندان کے بزرگوں کی ہی مرضی تھی۔

ایودھیا جاتے وقت بھی میاں بیوی میں جھگڑا ہوا تھا اور واپسی پر بیوی نے طلاق کی درخواست دائر کردی۔

فیملی کورٹ کے حکم پر دونوں کو اس وقت مشاورت کے مرحلے سے گزارا جارہا ہے تاکہ کسی طور معاملات درست ہوجائیں اور وہ ایک دوسرے کو قبول کرلیں۔