ایودھیا میں رام مندر کے افتتاح کے موقع پر جو مذہبی جوش و خروش پیدا ہوا اس کی لہر میں انڈیا ٹوڈے جیسا خالص سیکیولر سمجھا جانے والا جریدہ بھی بہہ گیا۔ جریدے نے ایک سرخی یہ بھی جمائی کہ رام چندر جی 500 سال بعد گھر واپس آئے ہیں۔

500 سال کا حوالہ اس لیے دیا گیا کہ انتہا پسند ہندوؤں کے نزدیک جہاں بابری مسجد تعمیر کی گئی تھی وہاں ایک رام مندر تھا۔ بابری سولہویں صدی عیسوی میں تعمیر کی گئی تھی۔

انتہا پسند ہندو موجودہ رام مندر کے احاطے کو اپنے بھگوان وشنو کے اوتار رام چندر جی کی جائے پیدائش مانتے ہیں۔ رام مندر کا پورا نام رام جنم بھومی مندر ہے۔ اس میں مورتی بھی کم عمر رام کی نصب کی گئی ہے۔

اس سرخی کے ذریعے انڈیا ٹوڈے نے یہ پیغام دیا ہے کہ مغل سلطنت نے رام چندر جی کو ان کے گھر سے نکال دیا تھا اور اب اکیسویں صدی میں ہندوؤں نے اپنے زورِ بازو سے رام جی کو دوبارہ ان کا گھر دلایا ہے۔