جدید ترین ٹیکنالوجیز سے آراستہ گاڑیاں استعمال کرنے کے شوقین یہ جاننے کے لیے یقیناً بے تاب ہوں گے کہ رواں سال پاکستان میں کون کون سی جدید گاڑیاں لانچ کی جانے والی ہیں۔

چیری پاکستان نے رواں سال دو کاریں لانچ کرنے کی تیاریاں مکمل کرلی ہیں۔ ان کاروں کے نام ہیں Omoda E5 اور Jaecoo J7 PHEV۔ یہ دونوں کاریں مقامی مارکیٹ میں چیری کے بینر تلے پیش کی جارہی ہیں۔

ذرائع کا کہنا ہے کہ چیری پاکستان ہائبرڈ الیکٹرک وہیکل (HEVs) اور پلگ اِن ہائبرڈ الیکٹرک وھیکلز (PHEVs) مارکیٹ میں لانے والی ہے۔

کاریں اسمبل کرنے والا یہ ادارہ ٹِگو سیریز کی کاریں لانچ کرنے والا ہے۔

ذرائع نے بتایا ہے کہ چیری پاکستان یہ کاریں سالِ رواں کی تیسری سہہ ماہی میں لانچ کرے گی۔ اِن سے قبل ٹِگو سیریز کی کاریں ریلیز کی جائیں گی۔

رواں سال پاکستانی صارفین کو ان کی پسند اور ضرورت کی کئی گاڑیاں ملیں گی۔ ایندھن کے بڑھتے نرخوں کے پیش نظر ہائبرڈ گاڑیاں ملکی ماحول اور ضرورت کے مطابق ہیں۔ اس سے قبل پاکستان میں ہائبرڈ کاریں ہیول (ایچ سکس)، ہونڈائی (سانتا فی) اور ٹویوٹا (کورولا کراس) نے پیش کی تھیں۔

صارفین نے یہ گاڑیاں کم ایندھن میں زیادہ سفر کے حوالے سے پسند کی تھیں۔

مستقبل الیکٹرک کاروں کا ہے اس لیے بیشتر ادارے ہائبرڈ کاریں تیار کرنے کو ترجیح دے رہے ہیں۔ ہائبرڈ گاڑیاں وہ ہیں جو پیٹرول یا ڈیزل سے بھی چلتی ہیں اور بجلی سے بھی۔ ٹویوٹا جیسے بڑے ادارے ہائبرڈ ٹیکنالوجی پر زیادہ توجہ دے رہے ہیں۔