بھارت میں ایک شخص مسافر طیارے کے ٹوائلٹ میں پھنس گیا۔ بدحواس ہونے پر عملے نے خصوصی نوٹ لکھ کر اس کی ڈھارس بندھائی۔

یہ حادثہ 16 جنوری کو ممبئی سے بنگالورو (بنگلور) کی پرواز کے دوران رونما ہوا۔ اسپائس جیٹ ایئر لائن کے طیارے میں ایک مسافر ٹوائلٹ گیا تو تالا خراب ہوجانے پر ایک گھنٹے تک پھنسا رہا۔

مسافر ٹیک آف کے فوراً بعد ٹوائلٹ گیا اور طیارے کے بنگالورو پہنچنے تک نکل نہ سکا۔

لینڈنگ کے بعد ائر پورٹ کے ٹیکنیشینز کو بلایا گیا جنہوں نے دروازہ کھولا۔

اسپائس جیٹ نے اس حادثے پر معذرت کا اظہار کرتے ہوئے مسافر کو ٹکٹ کی پوری رقم واپس کردی ہے۔

ائر لائن کا کہنا ہے کہ پرواز کے دوران ٹائلیٹ میں پھنسے ہوئے مسافر کی عملے نے مسلسل راہ نمائی کی اور ڈھارس بندھائی۔

دروازہ کھولنے کی کوششیں ناکام ہوجانے پر کیبن کریو نے ایک نوٹ لکھ کر ٹائلیٹ کی جھری سے اندر داخل کیا جس میں مسافر سے کہا گیا تھا کہ وہ بدحواس نہ ہو اور سکون سے بیٹھا رہے۔